Тие на вечерашниот концерт насловен како „Вечер на француска музика“ во катедралната црква „Света Софија“ ќе свират дела на познати француски автори, композитори како Леке, Масне, Форе и Равел.

Пјер Омаж е роден во Авињон, каде и почнал да учи музика на градскиот Конзерваториум, пред да биде примен во класата на Кристијан Фера, на Високиот конзерваториум за музика во Париз. Тој на конзерваториумот добил бројни први награди по виолина и камерна музика. Исто така работел и со рускиот виолинист Виктор Либерман и добил почесна диплома од Кигиана академијата во Сиена во класата на Хајнрик Шеринг и Франки Гули. Ја започнува својата кариера истата година во Италија на меѓународниот фестивал на Кремона, свирејќи ги соло Сонатите и Партитите на Ј. С. Бах, рамо до рамо со Салваторе Акардо и Шломо Минц. Од тогаш уметничката активност на Пјер Омаж расте низ Европа и САД. Работел со диригенти како: Карло Марија Џулини, Хербет Фон Карајан, Франко Ферара, Сер Џорџ Солти, Рикардо Мути и други. Неговото големо техничко и музичко мајсторство, чистината и топлината на вибратото, комбинирани со неговиот високо-емоционален сензибилитет, ги претвараат неговите настапи во уникатни моменти. Овие квалитети се препознаени и почитувани од публиката и меѓународната критика, која посочува на Пјер Омаж како еден најдобрите француски виолинисти на неговата генерација.

Мишел Бурдонкл е роден во Марсеј во 1960 година. Започнува да учи музика со Жаклин Куртен и Бернар Флавињи во Екс во Прованса. Го продолжува своето образование во класите на Женевјев Жој и Доминик Мерле на Високиот конзерваториум за музика во Париз каде што е добитник на први награди за камерна музика и пијано. Во 1981 продолжува да учи камерна музика во класата на Жан Ибо и работи како пијано придружник на Високиот музички конзерваториум во Париз. Мишел е победник на Меѓународниот натпревар „Асанте“ во 1984 во присуство на Јанис Ксенакис. Во 1986 година, Мишел Бурдонкл добива стипендија од француската Влада да учи на конзерваториумот „Чајковски“ во Москва во класите на Самвил Алумјан и Лев Наумов. Истата година е награден на „Лист“ натпреварот во Утрехт. Мишел Бурдонкл настапувал во Франција, Италија, Швајцарија, Шпанија, Португалија, Германија, Романија, Молдавија, Русија, Полска, САД, Бразил, Кина и Јапонија и со добри француски и странски оркестри. Неговата дискографија е снимена за „Дорон Музика“, „ЕМС Мастер Саунд“, „3Д Класикс“ и „Наксос Марко Поло“. Има направено бројни записи за радио и телевизија, со дела на Бах, Шопен, Лист, Дебиси, Форе, Берг, Месијан, Лутославски, Булез и други.

Поетокот на концертот е во стандардниот вечерен термин од 21 часот.