Српскиот министер за надворешни работи Вук Јеремиќ отпатува за Њујорк каде денеска ќе има средба со генералниот секретар на ОН, Бан Ки-мун, посветена на Косово по изнесеното мислење на Меѓународниот суд на правдата за косовската независност.

Јеремиќ ќе има и поголем број средби со постојаните амбасадори при ОН, а ќе одржи и консултации поврзани со подготвките за седницата на Советот за безбедност на Светската организација посветена на Косово, која е закажана за идната недела.

Србија вчера поднесе резолуција до Генералното собрание на ОН, во која се истакнува дека „едностраната сецесија не е прифатлив начин за решавање на територијалните прашања“ и се повикува на пронаоѓање решение за Косово по пат на дијалог.

- Имајќи предвид дека Меѓународниот суд на правдата не го потврди правото на косовските Албанци на отцепување од Србија, во резолуцијата јасно се наведува дека едностраната сецесија не е прифатлив начин за решавање на територијалните прашања, се наведува во резолуцијата и се повикува преку дијалог да се дојде до взаемно прифатливо решение за сите отворени прашања.

Во резолуцијата се бара и Генералното собрание на ОН да ја вклучи во својот дневен ред и точката за натамошните активности по донесувањето на советодавното мислење на Меѓународниот суд.

Во меѓу време, портпаролот на косовскиот претседател Фатмир Сејдиу, Џавит Беќири побара Србија треба да престане со оспорувањето на легитимноста на Косово.

- Очекуваме уште земји да не признаат. Веруваме дека повеќето земји во Генералното собрание на ОН ќе се согласат со нас, дека по оценката на Меѓународниот суд нема причина Србија да продолжува да ја оспорува легитимноста на Косово, рече Беќири.

Тој додаде дека властите на Косово се подготвени со Србија да разговараат за практични прашања, но не и за политичкиот статус.