|
Фудбалски спектакл вечерва во Скопје |
|
|
|
четврток, 29 јули 2010 |
|
Прославениот
англиски фудбалски гигант Ливерпул вечерва во Скопје ќе игра против Работнички,
во рамките на третото квалификациско коло во Лига Европа.
Љубителите
на спортот во Македонија, кои во изминатите години беа лишени од задоволството
да гледаат квалитетен клупски фудбал, со нетрпение го очекуваат почетокот,
бидејќи Ливерпул е несомнено најславниот клуб кој некогаш гостувал во
Македонија.
На вечерашниот спектакл и официјално ќе биде пуштена во употреба реновираната
Јужна трибина.
Од управата на Работнички информираат дека биле отпечатени 22.000 влезници, кои
пламнале за еден ден.
Тренерот на Работнички Зоран Стратев изјави дека неговиот тим ќе се обиде да
одигра најдобро што може и да постигне позитивен резултат.
„Ливерпул е шлагот на тортата, и ова ќе биде голем спектакл. Во составот нема
да менувам ништо. Концепцијата може да се менува зависно од резултатот во
самиот меч. Ќе започнам отворено со формација 4-4-3 со Вандаир, Зе Карлос и
Фабио Силва во нападот, но двајца од нив ќе мора да помагаат и во средината. Ќе
се обидеме да не загубиме, но ова е фудбал и се е можно“, рече Стратев на
вчерашниот прес.
Натпреварот започнува во 20.45 часот. Влезовите на арената „Филип Втори“ ќе
бидат отворени во 18,20 часот, а ќе бидат затворени во 19,45, еден час пред
почетокот на мечот.
На вечерашниот натпревар се очекуваат над 1.000 навивачи од Англија и близу 80
новинари.
|
