E kompozuar nga Ardit Gjebrea dhe me tekst të Pirro Çakos, "Nuk mundem pa ty" u përzgjodh si kënga më e mirë mes 20 këngëve finaliste, nga juria e përbërë nga emra të njohur të muzikës dhe artit, Luan Zhegu, Saimir Braho, Zana Çela, Flamur Shehu, Shaban Ibrahimi, Olent Çezari dhe Agron Tufa.

"Juria kishte si qëllim të vlerësonte në festival krijimtarinë më të mirë dhe jo interpretimin", tha  Çela pas shpalljes së këngës fituese.

Me çmim e dytë u vlerësua "Në pasqyrë", interpretuar nga Anjeza Shahini dhe me të tretin "Gjëra të thjeshta", interpretuar nga Kamela Islami.

Nata finale e evenimentit më të rëndësishëm të muzikës së lehtë shqiptare, u zhvillua mbrëmjen e kaluar në Pallatin e Kongreseve në Tiranë. Për më shumë se tre orë në këtë natë u prezantuan jo vetëm 20 këngët finaliste, por edhe pjesë koreografike nga Julian Bulku. Moment i veçantë ishte rikthimi në skenë i violinistit virtuoz shqiptar, Olent Çezari, njëkohësisht anëtar i jurisë, i cili prej vitesh e ushtron aktivitetin e tij artistik në Itali.

Festivali i 48-të i këngës në RTVSH u zhvillua për katër netë në Pallatin e Kongreseve, duke nisur nga 24 dhjetori. Në këtë edicion u interpretuan 36 këngë, 18 prej të cilave nga këngëtarë të njohur dhe 18 të tjera nga të rinj.

Në natën e parë intrepretuan këngëtarët e njohur, në natën e dytë të rinj, ndërsa nata e tretë iu dedikua dueteve të zgjedhura nga vetë këngëtarët kokurues.]

Festivali u realizua nga një staf i përbërë nga emra të njohur. Drejtoreshë e këtij edicioni ishte Zamira Koleci, udhëheqës Artistik Selim Ishmaku, regjisor Osman Mula, skenarist Genc Ymeraj.

Festivali i 48-të i këngës në RTVSH u prezantua nga këngëtarët Alban Skënderaj dhe Miriam Cani.