СЕХА Лига: Вардар го совлада Татран Прешов со 32:28

20.09.2017 08:54

И покрај уморот од гостувањето во Полска кај Висла во Лигата на шампионите, вардарци покажаа дека можат во континуитет да одиграат квалитетно и дека има долга клупа на која има квалитетни ракометари.

Ракометарите на Вардар синоќа забележаа уште една победа, го совладаа Татран Прешов со 32:28 во дуел од четвртото коло на регионалната СЕХА Газпром лига.

И покрај уморот од гостувањето во Полска кај Висла во Лигата на шампионите, вардарци покажаа дека можат во континуитет да одиграат квалитетно и дека има долга клупа на која има квалитетни ракометари.

Во домашниот состав поради повреда на грбот го немаше голманот Страхиња Милиќ, а одмор добија и бековите Даинис Криштопанс и Жоан Кањељас. На листата на повредени е и крилото Владо Недановски. Шанса повторно да играта добија Мартин Поповски и Тоше Ончев.

Дуелот со словачкиот тим „црвено-црните“ може да се каже дека го добија уште во првото полувреме во кое се стекнаа со предност од седум голови (18:11). Во еден момент од вториот дел имаа и плус 8, доволно за мирен финиш и сигурна победа.

За Вардар ова беше четврти триумф на исто толку средби од СЕХА, додека словачкиот тим го запиша вториот пораз.

На другите два вчерашни дуела: Мешков Брест – Динамо Панчево 29:26, ППД Загреб – Цеље 25:25.