Џафери во Вашингтон на средби со когресмените Питинџер, Адерхолд и Трот

07.12.2017 11:02

Соговорниците, како што стои во соопштението, констатирале дека САД и Република Македонија се наоѓаат на иста страна во борбата против тероризмот во светот...

Претседателот на Собранието, Талат Џафери во рамки на работната посета на САД имаше одвоени средби со конгресмените Роберт Питинџер, Роберт Адерхолд и Дејв Трот, соопштија од неговиот Кабинет.

Конгресменот Питинџер, кој е домаќин на Парламентарно безбедносниот Форум, истакнал дека е почестен што Џафери ја прифатил поканата за учество на овој значаен собир што е продолжение на форумот од јуни 2017-та година во Рига. Во тој контекст, помеѓу другото, Џафери го информирал конгресменот Питинџер за законските измени со кои што се санкционира учеството на наши граѓани во странски воени формации.

Соговорниците, како што стои во соопштението, констатирале дека САД и Република Македонија се наоѓаат на иста страна во борбата против тероризмот во светот. Владеењето на правото, слободата на говорот и независноста на институциите се основен фундамент за градење на здраво демократско општество интегрирано во НАТО и ЕУ, се наведува во соопштението.

За време на средбата со претседателот на македонското Собрание, конгресменот Адерхолд, кој е член на американската конгресна група пријатели на Македонија, се интересирал за општиот политички дискурс по трансферот на власта. Џафери, се посочува во соопштението, детално му ја претставил севкупната ситуација и приоритетите на Република Македонија во однос на исполнувањето на неопходните реформски процеси. Притоа, претседателот на Собранието истакнал дека евроатланските вредности мора да се вградат во ткивото на општествениот живот во Република Македонија, бидејќи тоа е за доброто и благосостојбата на граѓаните.

Џафери во американскиот Конгрес оствари средба и со копретседавачот со конгресната група пријатели на Македонија, Дејв Трот, кој неодамна ја посети Република Македонија во рамките на неговата европска турнеја.

Во однос на полноправното членство на Македонија во НАТО, конгресменот Трот истакнал дека конгресната група на пријатели на Македонија ќе продолжи да дава поддршка со сите средства и начини кои ги има на располагање.