Шекеринска во посета на Косово: Потврдена одличната соработка помеѓу двете земји

02.02.2018 16:03

Министерката за одбрана Радмила Шекеринска во Приштина, на средба со министерот на косовските безбедносни сили, Рустем Бериша. Потенцирано дека соработката во одбраната е добра. Двајцата соговорници се согласиле дека добрососедските односи се вистинскиот пат кон развиен и просперитетен регион...

Министерката за одбрана на Република Македонија, Радмила Шекеринска, денеска престојува во еднодневна официјална посета на Косово. На средбата во Приштина, министерката за одбрана, Шекеринска, и министерот на Косовските безбедносни сили, Рустем Бериша истакнаа дека билатералната соработка помеѓу двете министерства е на највисоко ниво. Оваа соработка е особено добра во областа на военото образование, и изразија подготвеност таа да продолжи интензивно да се развива и во иднина, соопштија од Министерството за одбрана.

„Македонија останува отворена за школување на питомци од Косово на Воената Академија, каде што се школуваат и питомци од Црна Гора и Босна и Херцеговина. Тие се идните воени лидери на нашите земји. Ако тие научат добро да соработуваат и ако градат доверба и соработка, нашите држави ќе имаат подобра иднина“, рече министерката.

Министерката најави дека припадници на Армијата на Република Македонија ќе бидат дел од регионалната вежба „Орел VI“ која треба да се одржи во мај во Косово. Ја истакна и заинтересираноста за користење на капацитетите на косовскиот Центар за барање и спасување, а ги понуди и капацитетите во Македонија како Регионалниот центар за односи со јавноста, Воено-медицинскиот центар и полигонот „Криволак“.

Во рамки на посетата, Шекеринска имаше средба со косовскиот премиер, Рамуш Харадинај.

Македонија и Косово се две пријателски земји, чии односи се базираат на меѓусебно почитување, доверба и отвореност за соработка, заклучија на средбата министерката Шекеринска и премиерот Харадинај. Министерката истакна дека Македонија цврсто верува дека добрососедските односи се вистинскиот пат кон развиен и просперитетен регион. Шекеринска посочи дека заедничката седница на двете влади планирана за оваа година ќе ја зајакне и унапреди соработката меѓу Македонија и Косово.

Министерката доцна попладне ќе се сретне и со командантот на КФОР, генерал – мајор Салваторе Куочи.