Расте бројот на пациенти поради аерозагадувањето, на Пулмологија отворена дополнителна амбуланта

Расте бројот на пациенти кои поради аерозагадувањето побарале помош на Клиниката за пулмологија. Затоа, како што вели директорот Докиќ, отворена е и дополнителна амбуланта со цел да ги прими сите пациенти со приоритетни упати. Со најлоша клиничка слика се хронично болните- оние со пневмонија, бронхитис, астма, белодробни фибрози.

„Аерозагадувањето смета не само на хроничните пациенти, туку е штетно и за здравјето на сите здрави индивидуи, поради тоа што предизвикува воспаление на слузокожата од носот и горните и долните дишни патишта, што може да се манифестира со кашлица, иритација во очите, гребење во грлото, потешкотии во дишењето“, изјави Дејан Докиќ • директор на Клиниката за пулмологија и алергологија.

Препораката е иста секоја година. Терапијата редовно да се зема, непотребно да не се излегува надвор, да се филтрира воздухот и да се носат заштитни маски.

Екипата на МТВ денеска разговараше и со синоптичарите од УХМР. Тие велат дека маглата нема да се крене во текот на денешниот ден, а исто така магловито време не очекува и во текот на утрешниот ден.

Магла, велат познавачите има во скопската котлина, додека на другите места имало дури и сончево време.

„До крајот на денот сепак маглата нема да се крене во скопската котлина, иако е помалку ветровито и во северните делови од земјата. Ќе се зголемува облачноста на западот и оваа облачност ќе се проширува и во централните делови од земјата, а услови за краткотраен дожд ќе имаме на запад и на северозапад“, изјави Борис Секирарски, УХМР.

Магловитото време попладне приземји повеќе авиони на скопскиот аеродром, а добар дел од закажаните летови беа пренасочени кон охридската воздушна база.

Анита Димитријевска