Од шестиот кат на зграда во Кисела Вода вчера попладне паднале 69-годишната Д.С. и деветгодишен малолетник.
Жената починала на местото на настанот, детето е хоспитализирано на интензивната нега на Детска хирургија и е во стабилна состојба, но со тешки повреди – велат од клиниката.
Правиме се за изнаоѓање на решение за надминување на спорот со Бугарија – порача премиерот Христијан Мицкоски по враќањето од Брисел и средбите со новото раководство на Европската Унија. Се разговарало за теми од суштинско значење. Биле понудени цврсти аргументи од страна на Владата.
Записникот од вонредниот надзор во Основното училиште „7 Март“ во тетовско Челопек е готов, инспекторите утврдиле неправилности поради што одговорност ќе понесе една од наставничките која била организатор на приредбата, изјави министерката за образование Јаневска.
Претседателката Гордана Сиљановска Давкова вчеравечер се обрати на свечената манифестација по повод доделување на признанието „Вељо Манчевски“ за 2024 година во организација на Комисијата за односи со верските заедници и религиозните групи.
Зголемена поддршка за Украина, силно сојузништво за зачувување на безбедноста во Европа. Во Брисел состанок на министрите за надворешни на земјите членки на НАТО. Министерот Муцунски порача дека Македонија мора да го зголеми буџетот за одбрана.
Соодветен и навремен одговор за инцидентите со сквернавењето на македонското и албанското знаме, постапка за секој што шири говор на омраза, министерот Тошковски за случувањата на денот на албанското знаме.
Нема да згасне случајот со бонусите на поранешното СЈО. Овој предмет кој неколку месеци беше причина за „војна“ меѓу државниот и вишиот скопски обвинител ќе продолжи во Обвинителството за гонење на организиран криминал и корупција.
На собраниската седница закажана за 10 декември се очекува да започне расправата за Предлог-буџетот за 2025 година.
Во четврток времето ќе биде облачно со повремени врнежи од дожд, на планините и на некои повисоки места во западните делови од снег и ќе се зголеми снежната покривка.
