Во охридскиот регион во пораст болестите поврзани со аерозагадувањето

Во пораст бројот на заболувања кои се поврзуваат со аерозагадувањето. Анализите во Охрид покажуваат загрижувачко зголемување на бројот на пациенти со респираторни, кардиоваскуларни, ендокрини и малигни болести.

Во период од четири години, од 2019-та до 2023-та во Охрид за 50 проценти е зголемен бројот на срцеви заболувања. Во пораст се и пациентите со белодробни болести, а меѓу нив најпогодени се децата.

„Специфичната стапка на оваа група заболувања се зголемува и кај најмладите кај децата до 6 години со тоа што стапката е повисока од 1.012 на 1.545 се зголемува и кај училишните деца и младина од околу 800 на 1.240 на 1.000 училишни деца и млади“, вели д-р Даниела Чингоска специјалист по социјална медицина и јавно здравје.

Лекарите препорачуваат здрав животен стил и избегнување рекреативна активност во деловите од денот кога контаминираноста на воздухот е висока.

„Таа докажана поврзаност меѓу аерозагадувањето и нашето здравје на целокупната популација, непропорционалното влијание врз ранливите категории особено се засегнати децата и старите и економскиот товар од хоспитализации, отсуства од работа итн., сето тоа алармира дека ние имаме многу сериозен проблем на којшто сите заедно треба да работиме‘, доадава д-р Чингоска.

Анализата на Центарот за јавно здравје во Охрид покажува поразителни податоци, во пораст се и малигните и нервните заболувања. Особено зголемен е бројот на пациентите со рак на дојка, простата и бели дробови.

Соња Рилковска