Муцунски: Благодарност до Унгарија за поддршката и грижата за македонските пациенти

Денеска во Будимпешта ја посетив болницата каде што се згрижени шестмина наши сограѓани. Добив информации за нивната здравствена состојба, се сретнав и со нивните семејства, а во мое име и во име на државата упатив искрена благодарност до медицинскиот тим за нивната професионална и посветена грижа, рече министерот Муцунски.

Справувањето со ваква несреќа е предизвик за секој здравствен систем, но унгарските лекари го даваат најдоброто од себе – со стручност и човечност. Поддршката се однесува не само на пациентите, туку и на нивните најблиски, кои преку нашите дипломатско-конзуларни претставништва добиваат целосна логистичка поддршка.

Министерството за надворешни работи и надворешна трговија, во координација со надлежните институции, работи на подготовките за нивно безбедно враќање, штом медицинските лица проценат дека се исполнети условите.