Муртезани: Реформската агенда е патоказ кој не е создаден за Брисел, туку пред сè за граѓаните што ги претставуваме

Министерот за европски прашања, Орхан Муртезани, денеска во Собранието се обрати на дебатата на тема: „Забрзување на интеграцијата: Придобивките од Реформската агенда за институционално зајакнување и усогласување со ЕУ“.

Во својот говор министерот Муртезани ја потенцираше важноста на Реформската агенда која претставува многу повеќе од листа на услови за членство во ЕУ.

„Таа е симбол на нашата заедничка амбиција за да изградиме поправедно, попродуктивно и потранспарентно општество. Улогата на Парламентот во овој процес е клучна. Тука, преку дискусии и одлуки, овие реформи добиваат вистински живот и импулс“- нагласи Муртезани.

Додаде дека реформите не се само прашање на закони, тие се прашање на лидерство. Потребна е храброст за да се прифати транспарентноста, интегритетот и отчетноста. Тие вредности мора да бидат неизоставен дел од нашата јавна администрација и државни институции. Со целосната имплементација на Законот за буџети и со реорганизација на државната администрација, веќе чекориме кон поефикасно и поодговорно управување, рече Муртезани.

На располагање ни се околу 750 милиони евра преку Инструментот за реформи и раст, средства доверени на Република Северна Македонија врз основа на нашиот потенцијал и нашата одговорност. Овие средства не се само финансиски алатки, туку се израз на довербата на Унијата во нашата волја и способност за успех, истакна министерот за европски прашања.