Кривичниот суд го одобри обвинителниот акт против Васил Јованов, возачот кој ја усмрти Фросина Кулакова

Советот за оценка на обвинителниот акт, го одобри обвинението против осомничениот Васил Јованов за кривичното дело тешки дела против безбедноста на луѓето и имотот во сообраќајот, поврзан со сообраќајката од крајот на јануари годинава на булеварот „Партизански одреди“ во Скопје, во која животот го загуби 22-годишната Фросина Кулакова од Неготино.

Формиран е кривичен предмет, кој ќе биде распределен на понатамошно судење согласно АКМИС-системот. Кога ќе биде определен термин за главна расправа, странките и јавноста ќе бидат известени, информираа од Кривичниот суд.