Се заоструваат тензиите меѓу Индија и Пакистан, од ОН повикаа на итна деескалација

Се заоструваат тензиите меѓу Индија и Пакистан. Расте загриженоста од ескалација на конфликтот меѓу двете нуклеарни сили откако вооружени исламистичките групи убија најмалку 26-мина туристи во индискиот дел на Кашмир. Индија го затвори воздушниот простор за пакистанските авиокомпании, откако истото претходно го стори и Исламабад. Десетици пакистански државјани кои живеат во Индија ги напуштија своите домови, по одлуката на Њу Делхи Пакистанците да ја напуштат територијата на Индија.

„Властите ми рекоа дека сум нелегален државјанин и треба да заминам. Само што се породив. Мојот сим има 14 дена. Не ми е дозволено да патувам, поради царскиот рез, но што да правам“, изјави Сара Кан – пакистанска државјанка.

„Мојата мајка дојде со нас, но индиските власти ја вратија назад. Ни рекоа дека со индиски пасош не е дозволено да ја премине границата“, изјави Мохамед Ајран – индиски државјанин.

„Апелирам до индиската влада и до претседателот Моди до го преиспитаат прашањето за оние граѓани кои се со мешани бракови – индиски и пакистански државјани и нивните проблеми со визите. Треба да им се дозволи да биде со своите семејства“, изјави Мухамед Имран – пакистански државјанин.

Од Обединетите нации загриженост поради зголемување на тензиите меѓу Њу Делхи и Исламабад. Во телефонскиот разговор со индиските и пакистанските власти, генералниот секретар Гутереш повикал на итна деескалација во регионот.

„Генералниот секретар Гутереш изрази длабока загриженост поради зголемените тензии меѓу Индија и Пакистан. Ја нагласи потребата од избегнување конфронтација што би резултираа со трагични последици. Генералниот секретар ги понуди своите служби за поддршка на било какви напори за деескалација“, изјави Стефан Дужарик – портпарол на генералниот секретар на ООН.

Исламистичките групи и претходно честопати вршеа напади во регионот, предизвикувајќи тензии и вооружени судири меѓу армиите на Индија и Пакистан. Њу Делхи овојпат реагира со жестоки напади, обвинувајќи го Пакистан дека ги поддржува сепаратистите во кашмир.

Маја Стојанова