ФЗО: Нема евидентирани случаи на непотребни медицински интервенции во изминатите четири години
Од ФЗО нагласуваат дека редовно вршат контроли на јавните и приватните здравствени установи, а по сопствен наод во овој период спровеле девет контроли за приватно наплатени средства.
Фондот за здравствено осигурување (ФЗО) соопшти дека во изминатите четири години не се евидентирани претставки од пациенти за непотребни медицински интервенции. Од ФЗО нагласуваат дека редовно вршат контроли на јавните и приватните здравствени установи, а по сопствен наод во овој период спровеле девет контроли за приватно наплатени средства.
„ФЗО со должно внимание ги следи сите прашања поврзани со квалитетот, безбедноста и законитоста на здравствените услуги. Посветени сме на транспарентноста, почитувањето на законите и заштитата на правата на пациентите“, наведуваат од Фондот.
Оттаму појаснуваат дека немаат законска надлежност да ја оценуваат медицинската оправданост на интервенциите, ниту да вршат инспекциски надзор врз стручната работа на установите. Тие овластувања се во доменот на Државниот здравствен и санитарен инспекторат и специјални комисии на Министерството за здравство.
Фондот апелира јавната дебата за овие прашања да се води на основа на проверливи факти, без генерализации и сензационализам, со цел зачувување на довербата во здравствениот систем.