Турска инвестиција вредна три милиони евра влегува во Македонија

Нова турска инвестиција влегува на македонскиот пазар. Директорот на „Мач Груп“, компанија од областа на земјоделството и прехранбената индустрија, Атај Мач, денеска во Анкара ја објави одлуката на својата компанија за реализација на инвестиција во Република Македонија. Ќе гради фабрика и откупен центар. 

„Ги истражуваме условите за инвестирање во Македонија две години и донесовме заклучок дека тоа е најдоброто место за инвестирање во регионот. Имаме фабрики и капацитети во Турција и размислуваме за проширување на нашиот бизнис во Европа и истражувајќи во повеќе држави дојдовме до сознанието дека Македонија е најсоодветна. Гледаме огромен потенцијал во Македонија. Купивме земјиште и сега планираме да започнеме со изградба на фабрика во Скопје. За понатамошните планови најпрво сакаме да изградиме откупен центар во Скопје и откако ќе го завршиме планираме да инвестираме во земјоделие и во добро земјиште кое ќе ни донесе приноси“, изјави Атај Мач.

Инвестицијата која „Мач Груп“ ја планира е во општината Илинден и е во вредност од 3 милиони евра. 

Претседателот на владата Никола  Груевски со владината делегација  ја продолжува работната и официјална посета на Република Турција. Попладне Груевски ќе се сретне со турскиот претседател Реџеп Таип Ердоган и со премиерот Ахмет Давутоглу.