Аларм за менталното здравје кај децата

„Не ми се живее“, „Ова нема смисла“, се дел од вистинските повици за помош, кои не смее да се игнорираат. Родителите, службите во училиштата, но и институциите мора заеднички да работат за подобрување на менталното здравје на децата, сметаат стручните лица, откако анализата од СОС линијата „Ало бушавко“ покажа алармантни податоци со суицидални мисли. Неопходно е препознавање на промените во однесувањето и емоциите. Психолозите потенцираат и дека металното здравје не смее да биде тема, актуелна по трагедиите. Советуваат да се зборува за справување со стресот, врсничкото насилство и веднаш да се реагира.

„Оваа појава не е нешто што се случува одеднаш и изолирано туку се јавува многу порано и зборува за притисоците, очекувањето, чувството на осаменост, прекината комуникација, намалено чувство на припадност и емоционална безбедност, во системите околу детето дома, на училиште, меѓу врсниците и самото општество. Децата денес раснат во сè поголема изложеност на информации, притисоци за успех, споредби, социјални мрежи а во се помал простор на вистинска емоционална поврзаност“, истакна Александра Милевска, дипломиран психолог и семеен и системски советник.

Експертите укажуваат и дека децата денес често се гледаат низ призмата на оценки, постигнувањата, а се помалку нивната внатрешна состојба. Велат тие сакаат да бидат слушнати без осуда. Ги прашавме. Повеќето велат би побарале помош.

Психолозите освен поголема психолошка поддршка во училиштата, потенцираат дека е неопходна и психоедукација, простор и поддршка на родителите.

СОС-линијата +389 70 390 632 за деца и млади „Ало, бушавко“ останува отворена. Децата можат да побараат совет, споделат свое мислење, добијат поддршка.

Елена Георгиевска