Прв домашен пораз на Оклахома, Индијана доминантна

Во трите одиграни натпревари во НБА лигата, домашните екипи остварија две победи. Екипата со најдобар ефект во Источната конференција, Индијана, беше доминантна против најтрофејниот клуб во историјата, 17 – кратниот шампион, Бостон. Предводени од Пол Џорџ со 24 постигнати поени, кошаркарите на Индијана ја забележаа 22 – та победа, и ја задржаа лидерската позиција со само 5 порази досега. Со 17 – от пораз во 29 – от настап, Бостон е осмопласиран на истокот.  

Кошаркарите на Торонто продолжуваат со одлични резултати. На гостувањето кај Оклахома Сити, и го нанесоа првиот домашен пораз на досега најуспешната екипа во лигата, со 104:98. Домашните водеа се до последната четвртина, која противникот ја доби со 29:14, и направи голем пресврт. Бекот Ловри имаше ’’ол - стар’’ издание, со 22 поена, 7 скокови, 9 асистенции и 4 украдени топки, крилниот центар Џонсон оствари 17 поени и 13 скокови, а петмина од редовите на канадскиот тим имаа двоцифрен број поени. Кај Оклахома, освен тандемот Вестбрук со 27 поени, и Дурант со 24, немаше расположени играчи во нападот. Иако со негативен ефект од 11 победи и 14 порази, Торонто е четврторангиран на истокот, зад Индијана, Мајами и Атланта на Перо Антиќ. Оклахома има 22 победи и само 5 порази, со што падна на втората позиција на западот, зад Портланд.

Во најнеизвесниот натпревар, Лос Анџелес Клиперс ја совлада Минесота дури по продолжението. Блејк Грифин со 32 поени и 10 освоени топки под обрачите, беше најзаслужен за победата од 120:116, во која Крафорд постигна 22 поена, а Пол 19 поени и 13 асистенции. Кај Минесота не помогна ни фантастичниот тандем Лав – Пековиќ, кој комбинирано постигна 79 поени и 33 скокови, со над 60 процентна прецизност од игра. Лав имаше 45 поени, 19 скокови и 6 асистенции, а Црногорецот Пековиќ, кој има одлична сезона, заврши со 34 поени и 14 скокови.

По овој натпревар ЛА Клиперс е четврти тим на западот со 20 победи и 9 порази, а Минесота со 13 победи и 15 загубени натпревари, се наоѓа на 11 – та позиција.