Болниците соочени со тужби од вработени
Непочитувањето на работничките права може да им пресуди на македонските болници. Фондот за здравствено осигурување претстави алармантни податоци. Над 1.800 вработени поднесле тужби против јавните здравствени установи. Побаруваат повеќе од 2 милиони евра.
Повеќе од 1.800 здравствени работници ги тужат државните болници и јавните установи во кои работат. Бараат исплата на над два милиона евра по основ на неисплатени додатоци на плата – прекувремена и ноќна работа, работа во смени, во недела и за време на државни празници.
Директорот на Фондот за здравство вели дека во дел од установите има масовно тужење од вработените. Според Клековски – зад најголем дел од тужбите стојат адвокати, вештаци и еден независен синдикат.
„Ги повикуваме директорите да ги применуваат правата од законите и од колективните договори таму каде што се оправдани, да пристапат кон спогодби за да ги избегнат адвокатските и судските трошоци. Истовремено ги повикуваме здравствените работници особено каде што има ниска ефикасност во установите да се откажат од судските спорови“, изјави Сашо Клековски – директор на ФЗОМ.
Финансискиот товар врз здравствената каса може да биде и значително поголем. Здравствениот дом во Кратово најавил околу 65 нови тужби, со побарувања од над 3,5 милиони денари. Од Фондот велат дека со Министерството за здравство и со репрезентативните синдикати работат на измени во колективните договори во делот на додатоците на плата.
Во средините каде што се исплаќале најмногу додатоци се водат и најголем дел од судските постапки. Куманово е лидер по бројот на тужби, додека пак Битола по висината на побарувањата.
Андријана Ѓурческа