Бабанеделиното училиште во Прилеп- прво женско училиште и зачеток на официјалното учителство
Пред точно 160 години Прилеп го добил првото женско, и воопшто, првото официјално училиште за образование и на момчиња и девојчиња. Поврзано е и со Трескавец и со првата прослава на сесловенските просветители, Светите Кирил и Методиј.
Го носи името на првата учителка, Недела Петкоска. За првпат во училишните клупи седнале и девојчиња. Бабанеделиното училиште е познато како прво женско и официјално училиште во Прилеп.
Машките деца дотогаш се образовале во ќелијни училишта или по домови, но преку 180 девојчиња од прилепско посакале да бидат образовани.
Училиштето е поврзано и со Трескавец и со првата прослава за сесловенските просветители, Светите Кирил и Методиј. По пожарот тогаш во Манастирот, дел од граѓата за негова обнова е наменета и за училиштето.
Со прекини работело и по Првата и по Втората Светска војна, до 60-тите години на минатиот век. Се учело од првиот македонски буквар.
Денес во него се три галерии со музејски поставки. Пред 100 години, Прилеп бил во врвот на просветителството и со најмногу училишта во Македонија.
Елизабета Митреска