Вооружен маж убиен по престрелка во близина на Белата куќа
Вооружен маж синоќа отвори оган кон контролен пункт во близина на Белата куќа во Вашингтон, по што бил смртно ранет од агенти на Тајната служба. Во инцидентот е ранет и случаен минувач, а американските власти соопштија дека напаѓачот не успеал да го пробие безбедносниот периметар околу претседателската резиденција.
Вооружен маж бил убиен во престрелка со агенти на американската Тајна служба во близина на Белата куќа во Вашингтон, откако отворил оган кон контролен пункт, соопштија американските власти.
Според соопштението на Тајната служба, агентите возвратиле на нападот, при што напаѓачот бил ранет и пренесен во болница, каде подоцна починал. Во престрелката бил ранет и случаен минувач, но засега нема информации за неговата состојба.
Американскиот претседател Доналд Трамп во моментот на инцидентот се наоѓал во Белата куќа.
Според американските медиуми, напаѓачот испукал неколку куршуми од западната страна на Белата куќа, но не успеал да го премине безбедносниот периметар околу претседателската резиденција. Полицијата ја блокираше областа, а новинарите добиле наредба да се засолнат.
Трамп подоцна им се заблагодари на агентите за „брзата и професионална реакција“, наведувајќи дека осомничениот имал претходни насилни испади и бил „опседнат“ со Белата куќа.