Њујорк Никс по 27 години повторно во НБА финале

Њујорк Никс обезбедија пласман во финалето на НБА плејофот, откако ноќеска славеа убедливо на гостувањето кај Кливленд со 130:93 и со максимални 4:0 ја затворија полуфиналната серија.

И покрај одличната партија на Донован Мичел, кој уфрли 31 поен за Кавалирс, домашниот тим немаше решение за расположениот состав на Никс. Во победничкиот тим се истакнаа Карл-Ентони Таунс со 19 поени и 14 скока, О Џи Ануноби постигна 17, а Лендри Шамет додаде 16 поени.

Со овој триумф, Њујорк првпат по 1999 година ќе игра во големото НБА финале. Тогаш Никси беа поразени од Сан Антонио со 4:1 во серијата. Последната шампионска титула франшизата ја освои во 1973 година.

Никс во финалето ќе го чекаат победникот од серијата меѓу Оклахома Сити и Сан Антонио, каде резултатот моментно е израмнет 2:2.

Воедно, Њујорк влезе и во историјата на НБА како четврти тим со 11 последователни победи во плејофот. Тимот претходно ги елиминираше Атланта со 4:2, а потоа и Филаделфија и Кливленд со по 4:0. Последен тим со ваков подвиг беше Голден Стејт во шампионската сезона 2016/17, кога Вориорс нанижаа 15 победи по ред.