Прослава на Курбан Бајрам

Човекот не се мери само по она што го има, туку и по она што е подготвен да го сподели. Оваа духовна порака е симболот на еден од најголемите муслимански верски празници, Курбан Бајрам. Познат и како празник на жртвата, тој носи пораката за посветеност, вера и подготвеност човекот да се откаже од своето, за повисока морална цел. Овој празник нè потсетува на важноста на жртвувањето, хуманоста и помагањето на ранливите категории, порача поглаварот на Исламската верска заедница во Македонија, Реис ул- улема Ефенди Шаќир Фетаи.

Честитки по повод празникот упати и државниот врв, со пораки за солидарност, разбирање и меѓусебна почит.

„Само преку разбирање, заемно уважување и култура на почит, различностите можат да бидат предност, а не слабост, да станат мост, а не препрека, да прераснат во единство, надминувајќи ги поделбите“-се вели во честитката на македонската претседателка Гордана Сиљановска-Давкова.

„Курбан Бајрам е повик за поголемо единство, мир и хармонија во нашето општество, зацврстувајќи ја вербата дека само заедно можеме да изградиме подобра иднина за сите граѓани. На Курбан Бајрам се обновуваат највисоките вредности на солидарноста, разбирањето и меѓусебната почит“, порака на претседателот на македонското Собрание, Африм Гаши.

„Во духот на празникот да продолжиме заеднички да градиме општество на разбирање, единство и почитување, каде различностите се наша сила, а заедништвото наша иднина“, се вели во честитката на премиерот Христијан Мицкоски.

„Вистинските вредности се во солидарноста, подадената рака и подготвеноста секому да се помогне. Да не заборавиме дека силата на едно општество се мери токму преку тоа колку сме обединети, хумани и подготвени заеднички да ги надминуваме предизвиците“, порача лидерот на СДСМ, Венко Филипче.

Одбележувањата на Курбан Бајрам продолжуваат и во следните два дена.

Марија Котовска