Русија подготвува нов напад од големи размери врз Украина, предупреди Зеленски

Украинскиот претседател вели дека Русија подготвува нов напад од големи размери врз Украина и ги повика жителите да обрнат внимание на предупредувањата за воздушен напад. Зеленски, исто така, сподели дека во петокот имал телефонски разговор со претседателот на Романија, откако руски дрон погоди станбена зграда при што две лица беа повредени.

„Имаме информации од разузнавачки извори дека Русија подготвува нов напад од големи размери. Ве молиме обрнете внимание на предупредувањата за воздушен напад и останете безбедни. Нашите служби за итни случаи се подготвени, воздухопловните сили и другите бранители на нашето небо ќе бидат на должност 24/7, како и секогаш. Прашањето за воздушната одбрана и потребата да продолжиме да помагаме на Украина да го заштити своето небо е наш врвен приоритет“, изјави украинскиот претседател, Володимир Зеленски.

Рускиот претседател Путин изјави дека неговата земја е подготвена да спроведе објективна истрага откако романските официјални лица изјавија дека залутан дрон лансиран од Русија повредил две лица во земјата членка на НАТО.

„Знаеме дека украинските дронови залутаа во финскиот воздушен простор, во полскиот воздушен простор и во одреден момент во воздушниот простор на балтичките држави. Првичната реакција беше потполно иста како и сега во Романија: Аларм! Русите доаѓаат! Русите напаѓаат!“ сепак, набргу потоа, се покажа дека инцидентите немаат апсолутно никаква врска со руските авиони, туку вклучуваат дронови од украинско потекло“, изјави рускиот претседател, Владимир Путин.

Вчерашниот инцидент е еден во низата беспилотни летала – и од Русија и од Украина – кои погодија членка на НАТО откако започнаа борбите во Украина во 2022 година.