Уште една неизвесна сезона за пчеларите, мразот ги уништи приносите
Повторно неизвесна сезона за пчеларите. Пролетниот мраз го уништи багремот. Кумановските пчелари сепак оптимисти се надеваат на приноси од повисоките места, како и ливадската паша. Цената засега останува иста, 600 денари.
Уште една неизвесна сезона за пчеларите. Пролетниот мраз направи големи штети врз багремот, кој е значаен за вкупниот принос на мед. Погледите повторно им се насочени кон временската прогноза. На реоните каде што багремот не е целосно уништен, ноќните температури се ниски, а ветерот и дождовите не им дозволуваат на пчелите да собираат нектар, па приносите засега се под очекувањата. Пчеларот Тони од кумановско Довезенце, сепак е оптимист. Надежите се насочени кон повисоките места каде што багремот не е измрзнат, како и кон ливадската паша.
„Најважно е временските услови ноќните температури да се од 12 степени нагоре, за багремот од 25 до 27 да почне да меди. Го гледаме багремот дека има цвет но пчелата не излегува, временските услови ветер, дожд, го суши багремот, не може ништо да придонесат пчелите во сандачињата. Да се надеваме дека ќе има придонес од багремот на повисоките места каде што не е измрзнат. Да се надеваме, ливадата е во тек, доколку има дожд ќе има и мед“, истакна Тони Димитриевски, пчелар с. Довезенце, кумановско.
Лошите временски услови влијаат и врз развојот на пчелните семејства. Дополнително трошоците за производство постојано растат – од горивото за патување до пчеларниците во руралните средини, рамките и лековите. Годинава сè уште доцни и исплатата на субвенциите.
За да им излезе во пресрет на граѓаните, изминатите години здружението „Пчела“ од Куманово донесе одлука да не се покачува цената на медот. Истата изнесува 600 денари.
Елена Георгиевска