Претседателката Сиљановска-Давкова во официјална посета на Република Словачка

Претседателката Гордана Сиљановска-Давкова од денеска престојува во официјална посета на Република Словачка. Таа утре во Братислава ќе биде пречекана со највисоки државни и воени почести од претседателот на република Словачка, Петер Пелегрини. Предвидено е Сиљановска-Давкова и Пелегрини да одржат тет-а-тет средба, по што ќе следува пленарен состанок на македонската и словачката делегација. Македонската претседателка ќе оствари средби и со претседателот на Националниот совет на Република Словачка, Рихард Раши, како и со потпретседателот на словачката влада и министер за одбрана, Роберт Калинак.

Во рамките на посетата претседателката Сиљановска-Давкова ќе ја посети групната изложба „Од глаголица до светлина: визуелна ода за Св. Кирил и Методиј“, на која ќе бидат претставени дела од македонските уметници.