Сиљановска- Давкова со највисоки почести пречекана во Словачка
Претседателката Гордана Сиљановска-Давкова денеска во Братислава беше свечено пречекана од словачкиот претседател Петер Пелегрини со највисоки државни и воени почести. На средбите беше разговарано за унапредување на билатералните односи, поддршката на Словачка за македонските евроинтеграции, како и за економската соработка, инвестициите и регионалната безбедност.
Претседателката на државата, Гордана Сиљановска-Давкова, денеска ја започна официјалната посета на Словачка, каде во Братислава беше пречекана со највисоки државни и воени почести од словачкиот претседател Петер Пелегрини.
По официјалниот пречек, двајцата претседатели одржале тет-а-тет средба, по што следувал пленарен состанок на македонската и словачката делегација.
Во фокусот на разговорите биле билатералните односи меѓу двете земји, политичката соработка и поддршката што Словачка ја дава на македонскиот евроинтеграциски процес. Се разговарало и за можностите за продлабочување на економската соработка, трговската размена и инвестициите, како и за заеднички проекти во енергетиката, инфраструктурата, туризмот и иновациите.
Соговорниците размениле мислења и за актуелните безбедносни и геополитички предизвици во Европа, соработката во рамки на НАТО и потребата од стабилност и јасна европска перспектива за регионот.
Во рамки на посетата, Сиљановска-Давкова ќе оствари средби и со претседателот на словачкиот парламент Рихард Раши, како и со потпретседателот на Владата и министер за одбрана на Словачка, Роберт Калињак.