Почнува битката за титулата во домашната фудбалска елита

Во петок, со натпреварот меѓу Тиквеш и Арсими во Кавадарци, ќе започне 35. издание на домашното фудбалско првенство.

Во новата сезона ќе настапуваат Вардар, Шкендија, Струга, Силекс, Тиквеш, Арсими, Башкими, повратниците во елитата Брегалница и Скопје, како и Шкендија Арачиново, која е единствениот дебитант во најсилната домашна лига.

Шампионската титула ја брани Вардар, а според засилувањата и активностите во преодниот рок, меѓу главните кандидати за трофејот се Шкендија, Струга и Силекс.

Покрај борбата за титулата, посебно внимание се очекува и во трката за местата што обезбедуваат настап во европските натпреварувања, како и во битката за опстанок, во која секој бод може да биде одлучувачки.

Сезоната 2026/27 ќе се игра според нов систем, со првенство поделено во четири фази, што треба да донесе голема неизвесност и силно ривалство уште од првото коло до самиот крај.

Планирано е сезоната да трае до крајот на мај 2027 година.