Не го чувајте авокадото покрај банани - ќе созрее и ќе се расипе многу побрзо

Сте чекале цела недела авокадото да созрее, а кога конечно сте го пресекле, ве дочекала кафеава и кашеста внатрешност? Иако можеби ќе помислите дека станува збор за лош плод, причината може да биде овошјето што сте го чувале во негова близина.

Главниот „виновник“ за пребрзото зреење и расипување на авокадото најчесто се бананите.

Авокадото, бананите и јаболката спаѓаат во групата овошја што продолжуваат да зреат и по бербата. Во текот на овој процес тие ослободуваат етилен - природен растителен хормон во гасовита форма, кој го забрзува зреењето и на овошјето во непосредна близина.

Токму затоа, доколку авокадото го чувате заедно со банани, јаболка или киви, тоа може значително побрзо да созрее, но и побрзо да стане презреано.

Сепак, овој процес може да биде и корисен. Доколку сакате авокадото побрзо да созрее, ставете го во хартиена кеса заедно со банана, јаболко или киви. На тој начин етиленот ќе се задржи во кесата и ќе го забрза процесот на зреење.

Како правилно да го чувате авокадото?

Недозреаното авокадо најдобро е да се чува на собна температура. Зрело е кога плодот благо попушта при нежен притисок со дланката.

Кога ќе созрее, авокадото може да се стави во фрижидер, со што дополнително ќе се забави процесот на зреење. На овој начин може да остане употребливо и до една недела.

За веќе пресечено авокадо важат малку поинакви правила. Ако сте искористиле само половина, на пресечената страна нанесете неколку капки лимонов сок. Тоа ќе помогне да се забават оксидацијата и потемнувањето.

Потоа авокадото треба цврсто да се завитка во фолија и да се стави во фрижидер.

Истата постапка може да се примени и ако сте пресекле авокадо што сè уште не е доволно зрело, спојте ги двете половини, добро завиткајте ги и ставете ги во фрижидер.

Затоа, доколку сакате авокадото да ви трае подолго, не го оставајте во садот со банани. А ако сакате побрзо да созрее, токму бананата може да ви биде најдобар сојузник.