Бројот на заболени од западнонилска треска се искачи на 43, надлежните ги засилуваат мерките
Болеста е потврдена кај уште три лица, првпат и кај жители на скопските општини Центар и Чаир. Здравствените власти ги засилуваат превентивните мерки и најавуваат прскање против комарци на високоризичните локации.
Бројката на заболени со западнонилска треска се искачи на 43. Болеста потврдена кај уште три лица, првпат од скопските општини Центар и Чаир. Вирусот присутен и кај угината птица која ја пријавиле граѓани во Агенцијата за храна и ветеринарство.
Здравствените власти и градоначалниците од скопските општини во координирана акција ги засилуваат превентивните мерки. Мапирани се високоризичните места.
Комарците не познаваат општини, затоа не може некаде да се прска, а некаде не, рече министерот Клековски, кој од наредната година најави позасилени активности.
Центарот за јавно здравје ги мапираше локациите и ќе го организираат прскањето. Оттаму уверуваат дека средствата против комарците се целосно безбедни за луѓето.
Досега четири лица починаа од вирусот на „Западен Нил“, а првиот случај беше регистриран во мај.
Викторија Милевска