Во Полска роботи протестираа против вештачката интелигенција
Околу 30 роботи одржаа протест пред Министерството за дигитални прашања во Варшава, главниот град на Полска, со цел да го привлечат вниманието кон влијанието на вештачката интелигенција и роботизацијата врз пазарот на трудот и да повикаат на воведување законска регулатива.
На протестот, организиран од иницијативата „Democratism“, учествуваа различни видови роботи - од двоножни хуманоидни роботи до четириножни роботски кучиња.
Роботите со знамиња се движеа пред зградата на Министерството, додека преку звучници се емитуваа пораките: „Заштитете ги работните места“, „Време е да се постават правила“ и „Не чекајте, регулирајте“.
Хуманоидниот робот Agibot A3, поддржан од вештачка интелигенција, кој учествуваше на протестот, изјави дека роботите имаат цел да покажат дека оваа технологија повеќе не е дел од некоја далечна иднина, туку веќе е реалност.
„Роботите што се наоѓаат овде имаат цел да покажат дека оваа технологија повеќе не е далечна иднина, туку веќе е реалност“, изјави Agibot A3.
Организаторот на протестот, Гжегож Кулис, истакна дека нивното внимание е насочено кон ризикот хуманоидните роботи и вештачката интелигенција да ги заменат луѓето, особено на работните места што подразбираат интелектуална работа.
„Ако не реагираме сега, наскоро би можеле да се соочиме со голем проблем. Потребни ни се правила и регулативи што ќе служат како штит за заштита на работниците“, рече Кулис.
Полскиот министер за дигитални прашања, Кшиштоф Гавковски, го посети местото на протестот и разговараше со организаторите.
Гавковски предупреди дека интегрирањето неконтролирани модели на вештачка интелигенција во хуманоидни роботи, како и можноста тие роботи дополнително да се развиваат во текот на нивното функционирање, претставуваат сериозен ризик.
Во јули годинава, полскиот претседател Карол Навроцки го одобри предлог-законот со кој во земјата треба да се спроведува Законот за вештачка интелигенција на Европската Унија.