Преминот од исхрана со малку кон исхрана со многу јаглехидрати влијае врз имунолошкиот систем

Истражувачи предводени од „Лангон хелт“ при Универзитетот во Њујорк ги анализирале податоците од контролирано истражување за исхраната во кое учествувале 54 возрасни лица на возраст од 18 до 50 години.

Според истражувањето, зголемувањето на внесот на јаглехидрати по период на исхрана со малку јаглехидрати може да предизвика различни промени во организмот и да влијае врз имунолошкиот систем, особено во зависност од видот на јаглехидратите што се консумираат.

Во истражувањето биле анализирани навиките во исхраната на 54 возрасни лица со прекумерна телесна тежина или дебелина. Учесниците најпрво следеле исхрана со малку јаглехидрати и изгубиле околу 15 проценти од телесната тежина.

Потоа биле поделени во различни групи според начинот на исхрана. Една група продолжила со исхрана со малку јаглехидрати, додека другите преминале на исхрана со висока содржина на јаглехидрати.

Во една од овие групи, најголемиот дел од јаглехидратите потекнувале од рафиниран скроб.

Рафинираниот скроб се однесува на јаглехидрати што се наоѓаат во белиот леб, белиот ориз, производите од бело брашно и некои преработени житни производи, кај кои во процесот на преработка е намалена содржината на растителни влакна и одредени хранливи материи.

Истражувачите откриле значајна разлика при споредбата на групите што консумирале храна богата со јаглехидрати.

Кај групата чија исхрана била богата со рафиниран скроб била забележана поголема активност на одредени клетки на имунолошкиот систем. Исто така, поактивни биле и некои биолошки процеси поврзани со воспалителните реакции во организмот.

Според истражувачите, причината за ова би можела да биде способноста на рафинираните јаглехидрати побрзо да го зголемат нивото на шеќер во крвта.

Брзото зголемување на шеќерот во крвта може да активира одредени делови од имунолошкиот систем и да поттикне воспалителни процеси.

Резултатите од истражувањето не значат дека „сите јаглехидрати се штетни“.

Напротив, студијата укажува дека, покрај количината, важно е и од кои извори потекнуваат јаглехидратите.

Истражувачите, исто така, утврдиле дека кај групата што консумирала поголеми количества шеќер одредени имунолошки реакции биле послаби. Сепак, тоа не значи дека шеќерот е поздрав. Намалувањето на одредени реакции на имунолошкиот систем исто така може да има несакани последици за организмот.

Научниците нагласуваат дека се потребни поголеми и подолготрајни истражувања, бидејќи оваа студија била спроведена на мал број учесници и траела само 10 недели.

Главната порака од истражувањето е дека при зголемување на внесот на јаглехидрати по период на исхрана со малку јаглехидрати, треба да се внимава не само на нивната количина, туку и на тоа од кои намирници потекнуваат.