Бензините поскапуваат, дизелот поевтинува од полноќ
Регулаторната комисија за енергетика донесе одлука за нови максимални цени на нафтените деривати, кои ќе важат од 15 септември. Бензините поскапуваат за 3,50 денари за литар, додека дизелот поевтинува за два денари.
Од ноќеска на полноќ се зголемуваат максималните малопродажни цени на бензините, екстра лесното масло и мазутот, додека дизелот поевтинува, одлучи Регулаторната комисија за енергетика.
Еуросупер БС-95 ќе се продава по максимална цена од 100,50 денари за литар, а Еуросупер БС-98 по 102,50 денари за литар, што е зголемување од 3,50 денари за литар.
Цената на Еуродизелот се намалува за два денари и ќе изнесува најмногу 99 денари за литар.
Екстра лесното масло за домаќинство поскапува за 4,50 денари и ќе чини најмногу 109,50 денари за литар. Мазутот поскапува за 2,242 денари за килограм и ќе се продава по максимална цена од 48,243 денари за килограм.
Од РКЕ информираат дека во просек малопродажните цени на нафтените деривати се зголемуваат за 2,86 отсто во однос на претходната одлука од 7 септември.
Промената е направена врз основа на повисоките референтни цени на нафтените деривати на светскиот пазар. При пресметката се применети и владините одлуки за намален ДДВ за дизелот и намалени акцизи за бензините и дизелот.
Од РКЕ појаснуваат дека станува збор за максимални цени, што значи дека трговците на големо и мало можат да ги формираат цените и пониско од утврдените максимални износи.