„The Pitt“ повторно најдобра драмска серија на „Еми“

Медицинската драма „The Pitt“ ја освои наградата за најдобра драмска серија на 78. доделување на телевизиските награди „Еми“, што синоќа се одржа во Лос Анџелес. Серијата вторпат по ред триумфираше во драмската категорија, а нејзиниот главен актер Ноа Вајл беше прогласен за најдобар актер во драмска серија.

Во драмските категории наградени беа и Риа Сихорн, која го освои својот прв „Еми“ за главна женска улога во „Pluribus“, Том Пелфри за споредна машка улога во „Task“ и Алисoн Џени за споредна женска улога во „The Diplomat“.

Најголемото изненадување во комедиската категорија беше „Widow’s Bay“, која ја освои наградата за најдобра комедиска серија. Продукцијата на „Apple TV“ освои вкупно шест награди на главната церемонија. Метју Рис беше награден за најдобар актер, додека Кејт О’Флин и Стивен Рут освоија признанија за споредни улоги. Серијата доби награди и за сценарио и режија.

Џин Смарт ја освои наградата за најдобра актерка во комедиска серија за улогата на Дебора Венс во „Hacks“. За 74-годишната актерка ова е петта последователна победа во истата категорија, со што оствари историски успех. Смарт сега има вкупно осум „Еми“ награди за актерски достигнувања.

Посебен момент беше и двојниот успех на Метју Рис, кој покрај наградата за „Widow’s Bay“, освои „Еми“ и за главна машка улога во ограничената серија „The Beast in Me“. Со тоа стана првиот актер кој во иста година освоил награди за главна улога и во комедија и во ограничена серија.

Во останатите категории, „DTF St. Louis“ беше прогласена за најдобра ограничена серија, „The Traitors“ за најдобра реалити натпреварувачка програма, а „The Late Show with Stephen Colbert“ ја освои наградата за најдобра емисија од разновиден карактер.

Церемонијата ја водеше Маришка Харгитеј, а хуманитарната награда „Боб Хоуп“ му беше доделена на актерот Мајкл Џ. Фокс.