Развиен нов материјал што произведува водород од сончева светлина и вода
Научниците развија нов кристален материјал кој со помош на сончева светлина ја разложува водата и произведува чист водороден гас, без потреба од скапи метали.
Хемиски инженери од Државниот универзитет во Орегон, САД, развија нова класа фотокаталитички материјали кои директно ја користат сончевата светлина за разложување на водата и производство на чист водороден гас, без потреба од скапи метални катализатори.
Во истражувањето била анализирана кристална структура наречена „BVR-19“, која има архитектура на метално-органска мрежа. За разлика од класичните методи за производство на водород, овој материјал може спонтано да се формира во водени раствори на собна температура, без дополнителна потрошувачка на енергија. Утврдено е дека под дејство на сончевата светлина значително ја забрзува реакцијата.
Истражувачите, анализирајќи го принципот на работа на системот, утврдиле дека необичните хемиски врски сулфур-сулфур во материјалот привремено се раскинуваат кога се изложени на светлина.
Високореактивните сулфурни соединенија што притоа се ослободуваат директно го обезбедуваат протокот на електрони потребен за разложување на водата на водород и кислород.
Благодарение на тоа што главната улога во реакцијата ја преземаат органските сулфурни компоненти во материјалот, наместо атоми на скапоцени метали како платина или паладиум, системот може ефикасно да произведува водород без потреба од дополнителен катализатор од благородни метали.
Развиениот фотокатализатор, според истражувачите, нуди значително поекономична алтернатива за производство на зелено гориво во споредба со традиционалните методи на електролиза, при кои водата се разложува со помош на електрична енергија и кои имаат високи енергетски трошоци.
Главниот автор на истражувањето, Киријакос Стилијану, изјави дека со промена на металните јадра на материјалот научниците ги испитувале фотокаталитичките способности на различни негови варијанти.
Според Стилијану, добиените принципи за дизајнирање на ваквите материјали би можеле значително да ги намалат трошоците за производство на новата генерација реактори што директно ја претвораат сончевата светлина во чисто гориво кое може да се складира.