Секој месец одлив на медицински сестри

Секој месец од јавното здравство заминуваат околу 40-ина медицински сестри. Едни бараат подобри услови и плати во европските земји, други заминуваат во приватните болници. Недостигот најмногу се чувствува на одделите за интензивна нега, има дефицит од инструментарки во операциони сали, а сестри фалат и на одделите за хоспитализација. Унијата бара средба со министерот за да се најде решение за проблемот.

„Она што во моментов сега ни е важно се континуираните конкурси, но не само да ги објавуваме како конкурси, туку потребна ни е реализација со буџетско обезбедување на вработувањата. Динамика на вработувањата и точни бројки. Да знаеме колку медицински сестри се потребни, колку ќе се испланираат да се вработат и со каква динамика ќе се вработуваат“, изјави Гордана Бешлиоска – претседател на Унијата на здруженија на медицински сестри.

Училиштата продуцираат доволно кадар, но потребно е да ги задржиме медицинските сестри да работат во државното здравство.

„Нема недостаток на ученици, туку ни се случуваат други нешта. Ние образуваме кадар за во странство, а тоа не треба да биде така. Се трудиме како влада и јас како министер за образование, а сигурна сум и дека министерот за здравство го прави тоа да овозможиме услови, со реновирање, со отворање на нови методи и се што е потребно во здравството да ги задржиме нив тука“, изјави Весна Јаневска – министерка за образование и наука.

Во земјава има околу 9.200 медицински сестри. За нормално функционирање на здравствените установи потребно е двојно повеќе.

За да се надмине проблемот со одливот на медицински сестри, од здружението велат неопходно е да се донесе законот за сестринска дејност кој ќе ја регулира оваа професија во однос на образованието, работните задачи и одговорностите.

Андријана Ѓурческа