Сезоната на грип почна, амбулантите полни

Вирусите ги полнат амбулантите. Доминираат респираторните со кашлица, покачена температура, малаксаност – на удар се децата. Доктор Мира Атанасова дневно има и по 30-тина прегледи со овие симптоми. Вели – годинава клиничката слика е потешка и трае подолго. Веќе е присутен и респираторно синцијалниот вирус кај доенчињата.

„Кај неколку пациенти јас веќе изолирав параинфлуенца тип 1 и тип 3, не се поврзани со вирусот на грип и таа клиничка слика. Тоа тип на вирус којшто прави горнореспираторни проблеми. Најчесто од типот ларингит, но типот 3 знае да направи проблем и на долни дишни патишта“, вели д-р Мира Атанасова – педијатар.

Доктор Атанасова засега немала пациент со грип, но посочува дека е тешко заболување кое може да предизвика компликации кај постарите, но и кај децата со хронични заболувања. Апелира до родителите да ги заштитат, а вакцинацијата е најефикасниот начин за превенција.

Имунизацијата против сезонски грип веќе е во тек. Од пријавените 55 илјади граѓани, досега примиле вакцина околу 800-тини, најмногу постарите и хронично болните.

„Доколку граѓанинот го испушти закажаниот термин, може да го искористи во наредните три до четири недели, во пунктот каде што имаат закажано. Кај здравствените работници вакцинацијата е задолжителна и пожелно е да се вакцинираат, но интересот не е толку голем како кај постарата старосна група, исто и кај децата и трудниците“, вели д-р Соња Ралева – вакцинален пункт „Бит пазар“.

Сезоната на грип почна, изминативе две недели има два потврдени случаја и 160 со симптоми на грип. За да се создаде имунитет, потребни се две недели, велат лекарите – ова е идеално време за вакцинација.

Триесетте илјади јужнокорејски вакцини не се доволни за сите граѓаните кои сакаат да се заштитат од сезонскиот грип. До средината на ноември се очекува да пристигнат уште 26 илјади дози, а целта е бројот на вакцини да достигне до 80 илјади.

Андријана Ѓурческа