Петмина кандидати во трка за шеф на Обвинителството за организиран криминал
Вкупно 187 јавни обвинители денеска со тајно гласање избираат нов раководител на Основното јавно обвинителство за гонење организиран криминал и корупција. За функцијата се пријавени петмина кандидати, а изборот се спроведува поради истекувањето на мандатот на актуелниот шеф Ислам Абази.
Јавните обвинители денеска избираат нов шеф на Основното јавно обвинителство за гонење организиран криминал и корупција (ОЈО ГОКК). Право на глас имаат 187 јавни обвинители, кои преку директен избор и тајно гласање ќе одлучуваат меѓу петмина кандидати – Фатон Азизи, Трајче Пеливанов, Лидија Раичевиќ, Искра Хаџи Василева и Јован Цветановски.
Гласачките места ќе бидат отворени од 8 до 16 часот. По завршувањето на гласањето, резултатите ќе бидат сумирани на јавна седница. Комисијата за спроведување на изборот, формирана од Советот на јавните обвинители, е во состав Ермон Незири, Светлана Стојковиќ и Кети Петкова.
Петтемина кандидати на седницата на Советот на јавните обвинители на 13 октомври ги претставија своите програми. Во нивниот фокус се јакнењето на истражните капацитети, борбата против корупцијата и перењето пари, финансиските истраги, поефикасното постапување и поголемата независност на Обвинителството.
Огласот за избор на основен јавен обвинител на ОЈО ГОКК беше објавен во „Службен весник“ на 21 август годинава.
Изборот се спроведува поради истекувањето на мандатот на актуелниот раководител Ислам Абази, кој беше избран на функцијата во октомври 2022 година.