Народна банка: АЛТА банка Битола продолжува да работи, привремената администрација е мерка за заштита на штедачите
АЛТА банка АД Битола не е во стечај, не ѝ е одземена дозволата за работа и продолжува да им ги обезбедува услугите на клиентите. Народната банка појаснува дека воведената привремена администрација е заштитна мерка поради случувањата поврзани со нејзиниот акционер во Србија, Алта банка АД Белград. Средствата на клиентите остануваат на сметките, но привремено се ограничува нивното повлекување и пренос надвор од банката.
АЛТА банка АД Битола продолжува да работи, а воведената привремена администрација не значи затворање на банката ниту активирање на механизмот за исплата на депозитите преку Фондот за осигурување депозити. Ова го соопшти Народната банка, појаснувајќи дека мерката е воведена исклучиво поради случувањата поврзани со акционерот со квалификувано учество, Алта банка АД Белград.
Од Народната банка нагласуваат дека битолската банка е ликвидна, високо капитализирана, има солиден квалитет на кредитното портфолио и ги исполнува супервизорските стандарди. Таа не е во стечај и не ѝ е одземена дозволата за работа.
Целта на привремената администрација е да се зачува стабилноста на банката, да се заштитат средствата и интересите на штедачите и другите доверители до разрешување на сопственичката состојба, односно промена на сопственоста.
Во меѓувреме, привремено е ограничена динамиката на одливот на средства. За физичките лица е определен неделен лимит од 10.000 денари, кој може да се користи со банкарските картички за подигање готовина и плаќања кај трговци. Внатрешните плаќања кон сметки на други физички и правни лица во рамките на банката остануваат неограничени.
Правните лица ќе можат да вршат неограничени внатрешни плаќања, но нема да можат да префрлаат средства надвор од банката преку домашните платни системи, ниту да повлекуваат готовина од банкоматите и шалтерите.
Приливите од странство преку СЕПА и кореспондентно банкарство ќе се одвиваат непречено, додека одливните плаќања кон странство привремено нема да бидат достапни ниту за физичките ниту за правните лица.
Од Народната банка посочуваат дека кредитокорисниците треба и натаму навремено да ги исполнуваат обврските кон банката. Штедните влогови на физичките лица се осигурени преку Фондот за осигурување депозити до 30.000 евра, согласно законските правила.
Народната банка континуирано ја следи состојбата и ќе ги преиспитува воведените ограничувања во зависност од нејзиниот развој. Институцијата ги повикува граѓаните да се информираат исклучиво од официјални извори и да не носат одлуки врз основа на непроверени информации, нагласувајќи дека масовното повлекување средства не е во интерес на штедачите.