Полициска акција против криминална група во Куманово
Во голема полициска акција против организирана криминална група што од утрово се спроведува во Куманово, меѓу приведените е и Драган Петровски-Штука. Тој е осомничен дека бил организатор на групата која подолг период дејствувала на кумановското подрачје.
Во тек е акција за сузбивање на организирана криминална група во Куманово. Акцијата ја спроведува Одделот за сузбивање на организиран криминал и корупција при Бирото за јавна безбедност, во координација со Јавното обвинителство за гонење на организиран криминал и корупција.
Според сомневања на истражните органи станува збор за група која подолг период дејствувала на подрачјето на Куманово.
Од МВР и ОЈО информираат станува збор за повеќе кривични дела, меѓу кои изнуда, перење пари, несовесно работење во службата.
Полициски службеници од Одделот за сузбивање на организиран и сериозен криминал при МВР вршат претреси во координација со надлежен јавен обвинител од ОЈО ГОКК во врска со кривичните дела-информираат од МВР.
Акцијата сè уште е во тек.
Низ Куманово се вршат претреси на повеќе места поврзани со осомничените. Предмет на проверка се и нотарски канцеларии, менувачници, поради можна поврзаност со активностите.
Акцијата следи по долготрајна оперативна истражна работа на полицијата и обвинителството. Надлежните најавуваат нови детали и информации во текот на денот.
Елена Георгиевска