Уставните измени клучни

Македонија доби подобра оценка во извештајот за напредокот од лани. Брисел констатира значителен напредок во реформската агенда. Земјава е меѓу првите, со најдобри резултати во рамките на Европскиот инструмент за реформи и раст. Премиерот го доби извештајот од евроамбасадорот Рокас. Уставните измени и понатаму остануваат клучни за отворање на преговарачкиот процес. Нашата позиција и понатаму е дека европските интеграции мора да се темелат на јасни правила, предвидлив процес и меѓусебна доверба, став на Владата.

„Во извештајот се потврдува и економскиот раст од 3,5 проценти во 2025 година, односно овој Европски извештај го опфаќа извештајниот период заклучно со 31 август оваа година, иако потоа и Меѓународниот монетарен фонд и Светска банка ги нивелираа своите прогнози во нагорна линија за оваа година. Зошто? Затоа што ги имаме, би рекол, повторно ажурирано извештаите за растот во 2024 и 2025. Во 2024 тој од 3 се нивелираше на 3,8, а во 2025 од 3,5 на 3,8 проценти“, изјави премиерот Мицкоски.

Евроамбасадорот Михалис Рокас порача дека Македонија го засилила својот ангажман, има напредок, посветена е на европскиот пат. Сега е моментот земјата да ги искористи можностите и да продолжи со напорите за исполнување на реформските приоритети.

„Ова се обврски преземени од земјата и ЕУ е подготвена да заврши со отворањето на преговорите во мигот кога ќе бидат донесени промените. Ги повикуваме сите политички страни да работат активно и да напредуваат кон членството на ЕУ, што секако бара национални напори со значителен дијалог меѓу политичките актери и општеството“, нагласи евроамбасадорот Рокас.

Од Владата порачаа дека ќе продолжат со реформите, зајакнувањето на институциите и борбата против корупцијата. Европската комисија ослободила 142,1 милиони евра во Реформската агенда. Во извештајот е нотирано економски раст од 3,5 проценти во 2025 година и намалена невработеност од 12,5 на 11,7 отсто.

Марина Стојанова-Тонева