Тошковски најави нови можности за вработување на најдобрите студенти во МВР и проширување на интервентната полиција

Министерот за внатрешни работи Панче Тошковски најави можност за директно ангажирање на најдобрите дипломирани студенти од државните универзитети во МВР, како и воспоставување интервентна полиција на територијата на целата држава. За реформите во полицијата, дигитализацијата и примената на современите технологии говореше на предавање пред студентите и професорите на Филозофскиот факултет во Скопје.

Тошковски посочи дека со законските измени ќе се овозможи соработка меѓу МВР и високообразовните институции, кои ќе учествуваат во изборот на најдобрите дипломирани студенти. Предвидено е годишно да се ангажира најмалку по еден студент од институциите со кои ќе бидат склучени договори.

Тој се осврна и на обновувањето на Полициската академија и повторното воведување на средното полициско образование, како и на континуираните обуки за полициските службеници.

Најави и проширување на моделот на интервентната полиција од Скопје на целата територија на државата, со цел побрзо и поефикасно справување со криминалот и нелегалната трговија со дрога.

Во однос на дигитализацијата, Тошковски го истакна проектот „Безбеден град“, посочувајќи дека примената на современите технологии, заедно со засилените контроли и превентивните активности, придонесува за подобрување на сообраќајната безбедност и намалување на бројот на загинати и повредени.

Информираше и дека МВР е меѓу петте селектирани институции за потенцијална награда на Светскиот полициски самит во Дубаи, за резултатите во сообраќајната безбедност и проектот „Безбеден град“.