Skopje Design Week од 21 до 27 ноември под мотото „Crafting Tomorrow“
Педесет млади дизајнери од Европа, локални занаетчии, предавања, панел-дискусии и детски претстави се дел од програмата на 13. издание на Skopje Design Week, кое ќе го поврзе традиционалното занаетчиство со современите дизајнерски практики и новите технологии.
Скопје од 21 до 27 ноември ќе биде домаќин на тринаесеттото издание на Skopje Design Week, кое годинава ќе се одржи под мотото „Crafting Tomorrow“. Фестивалот ќе ги обедини дизајнерите, креативците и претставниците на креативните индустрии, отворајќи дискусија за поврзувањето на традиционалните занаетчиски техники и локалното наследство со современиот и одржлив дизајн.
Во рамки на фестивалот ќе биде претставена европската платформа Next Gen, преку која ќе бидат изложени проекти на 50 млади дизајнери од Европа. Десетмина од нив ќе учествуваат и на петдневна дизајнерска резиденција во просториите на Public Room, со цел размена на знаења, искуства и воспоставување нови професионални соработки.
Програмата предвидува и базар на локални занаетчии и независни креативци, на кој ќе учествуваат 25 изложувачи. Акцентот ќе биде ставен на рачната изработка, автентичноста и поддршката на малите креативни бизниси.
Посетителите ќе имаат можност да проследат и четири предавања на архитекти и дизајнери од Австрија, Англија, Грција и Македонија, како и две панел-дискусии посветени на предизвиците на малите креативни бизниси и фриленс уметниците и дизајнерите. Во програмата се вклучени и две детски претстави.
Со мотото „Crafting Tomorrow“, годинашното издание го става во фокус односот меѓу традицијата и современите технологии, одржливото користење на ресурсите и значењето на рачната изработка. Фестивалот продолжува да ја афирмира локалната креативна сцена и да ја поврзува со европските и меѓународните дизајнерски текови.