Царина: Спречен шверц на храна, техничка стока, девизи, цигари

Редовните активности на царинските службеници минатата недела резултираа во откривање на обиди за шверц, при што е запленета поголема количина различна стока.

Цариниците спречија шверц на храна, додатоци на исхраната и алкохолни пијалоци, односно 75 килограми сувомеснати и млечни производи, откриени на преминот Блаце  при контрола на српски автомобил. На истиот премин откриен е и шверц на 50 кг пршута при контрола на автобус со црногорски регистарски таблички.

Цариниците запленија и 12 литри Vodka Smirnof и Jagermeister, откриени на граничниот премин Ќафасан при контрола на амбулантно возило со албански регистарски таблички.
Запленети се 28,2 кг диететски додаток за исхрана Soul (470 кесички од 60 гр), откриени на граничниот премин Табановце при контрола на српски автобус, пријавен за влез во државата.

Спречен е шверц и на 2.458 забни импланти и инструменти откриени на граничниот премин Деве Баир, при контрола на бугарско возило, со кое за влез во државата се пријавиле бугарски државјанин како возач и државјанка на Литванија како сопатник.

Царината заплени и репроматеријали и готови текстилни производи, како и цигари, стока за која постои сомневање дека повредува права од интелектуална сопственост- бебешки обувки, простирки, кујнски производи и сл.