Заразни заболувања во поплавените подрачја засега нема
Здравствените работници апелираат граѓаните да пијат флаширана вода. Најавуваат дека водоводите ќе се прочистуваат со таблети...
Се уште нема појава на заразни заболувања во поплавените подрачја. Во Штип, Пробиштип, Неготино и во помалите места зафатени од поплавите водата не е безбедна за пиење. Здравствените работници апелираат граѓаните да пијат флаширана вода. Најавуваат дека водоводите ќе се прочистуваат со таблети.
„Такви таблети во два наврати во минатото имаме обезбедено и преку Центрите за јавно здравје ќе бидат дистрибуирани“, изјави д-р Михаил Кочубовски- епидемиолог во Институтот за јавно здравје.
„Имаме контакт со Центрите за јавно здравје за едукација и информација на населението, во прв ред едукација на загрозените подрачја каде имаме проблем со водоснабдувањето“, вели д-р Жарко Караџовски- епидемиолог во Институтот за јавно здравје.
Дадени се препораки за дезинфекција на градинките и училиштата. Медицински епипи постојано се на терен и ја контролираат состојбата.
„Целта ни е во овој момент да превенираме тешки загрозувачки состојби, да може веднаш да се помогне да се интервенира, но да спречиме и појава на заразни болести“, вели д-р Јованка Костовска - Комисија за заштита од заразни заболувања.
На граѓаните во попладневните места поделени им се флаери со препораки како да постапуваат во вакви услови.
Андријана Атанасовска