Домашните компании го раздвижија југоистокот

Десетина индустриски зони функционираат на Југоистокот. Во нив се вработени околу 1.000 лица. Најголемиот дел се откупно- дистрибутивни центри, но има и капацитети од винската, текстилната и дрвната индустрија. Општините велат дека индустриските зони се акцелератор на локалната економија.

Домашни, но и странски инвеститори се одлучиле своите пари да ги насочат кон отворање на капацитети на југоистокот. Безмалку сите општини прават урбанистички планови за создавање нови зони. Василево планира една да биде специјализирана за развој на винската индустрија и туризам.

И општина Дојран ќе се вброи на листата на општини од југоистокот кои имаат вакви зони за економски развој. Веќе овој месец треба да почнат градежните активности на зоната кај Црничани на влезот на Нов Дојран на која на површина од 20 хектари ќе има 53 парцели.

Во делот на погодности на Југоистокот е и близината до границите со Бугарија и Грција кои се поврзани со магистралниот пат М5. Доколку се остварат плановите, компаниите кои се во процес на изградба, но и планираните, треба да обезбедат работа за над 2 илјади лица.

Катерина Давчева