Иванов на 18-тиот Евроазиски економски самит во Турција

Претседателот на Република Македонија, Ѓорге Иванов, придружуван од неговата сопруга Маја Иванова, од денеска до сабота ќе престојува во посета на Турција каде ќе учествува на 18-тиот Евроазиски економски самит на Фондацијата Мармара што ќе се одржи во Истанбул.

 

Иванов ќе се обрати на свеченото отворање на самитот, а ќе има обраќање и на сесијата на претседатели на тема „Патот до мирот: Каде оди хуманоста?“

 

На форумот најавено е учество на актуелни и поранешни претседатели, премиери, министри, истакнати личности од општествениот и политичкиот живот, невладиниот сектор и бизнис заедниците од 40-тина држави.

 

Во состав на македонската делегацијата се и министерот без ресор задолжен за привлекување на странски инвестиции Џери Наумоф и министерот без ресор Фуркан Чако, кои ќе ги презентираат поволностите за инвестирање во Македонија пред бизнисмените кои ќе учествуваат на Евроазискиот економски форум. На форумот ќе учествуваат и македонски компании.

 

Ова е петто учество на претседателот Иванов на Евроазискиот економски форум на Мармара фондацијата, што се организира секоја година, почнувајќи од 1998 година.

 

Мармара фондацијата е формирана 1985 година и е призната од страна на ОБСЕ. Преку своите советодавни капацитети ја претставува Турција во Економско-социјалниот совет на ОН. Фондацијата активно е вклучена во подобрување на регионалната соработка со цел да помогне во максимизирање на можностите што ги создава процесот на глобализација и минимизирање на неговите негативни ефекти.