Блискиот Исток и МАГРЕБ атрактивна извозна дестинација

Специфичен пазар со голем потенцијал кој може да биде искористен како алтернатива за зголемување на извозот на домашните компании. Со популација од 400 милиони потрошувачи земјите од Блискиот Исток и МАГРЕБ се атрактивна извозна дестинација. Се бараат стандардизирани производи и услуги во услови на висока конкуренција. Засега најмногу извезува прехранбената индустрија, а големи можности имаат хемиската, фармацевтската, текстилната, машинската индустрија, ИТ индустријата и градежништвото.

„Ако гледаме од страната на извозот претежно се извезува тутун и цигари, овошје, производи за исхрана од житарки и кондиторски производи, лекови, но и плоснати и валани производи од железо, мермер, травертин и други делови и апарати“, изјави Билјана Пеева- Ѓуриќ, директор во Стопанска комора на Македонија.

Извозот од година на година варира, дефицитот расте и лани експортот беше трипати помал од увозот. Засега најважни дестинации за нашите компани се: Ирак, Емиратите, Израел, Египет, Саудиска Арабија и Иран.

„Секаде претежно настапуваме сами бидејќи досега немало организиран пристап за настап на македонските компании. Во наредниот период, освен тој бизнис форум, планираме да пристапиме и кон организирано учество на саеми за прехранбената индустрија која навистина има голем потенцијал, меѓутоа и за другите индустрии за кои има потенцијал на овие пазари“, изјави Глигор Цветанов, претседател на Клубот за соработка со земјите на МАГРЕБ и Блискиот Исток.

Посебно внимание фирмите треба да посветат на правната рамка во овие земји, локалните обичаи, стандардите и традицијата, препорачува посебниот прирачник за олеснување на трговијата со компании од овие земји, што го изработи Стопанската комора на Македонија.

Свето Николовски