Демократите го одолговлекуваат назначувањето на членовите на кабинетот на Трамп

Сенаторите Демократи предводени од новиот лидер на малцинството во Сенатот Чак Шумер планираат со долги сослушувања да го одолговлекуваат назначувањето на  членовите на кабинетот на новиот американски претседател Доналд Трамп. На списокот се наоѓа новиот државен секретар Рекс Тилерсон и новиот Државен Обвинител Џеф Сизнс, за коишто сенаторите бараат увид во нивните финансии и врски со странски држави.

„Ќе поставуваме многу прашања и ќе видиме што ќе одговори господинот Тилерсон. Има Демократи и Републиканци коишто прашуваат за конфликтот на интереси на Тилерсон, за неговите блиски односи со Владимир Путин и Русија, и за неговата способност за рамнотежа помеѓу дипломат којшто се бори за американските интереси со неговото долгорочно искуство како бизнисмен на нафтена компанија“, изјави Крис Кунс, сенатор Демократ, член на Комитетот за надворешни работи.

Сенаторите Републиканци сметаат дека номинираните членови на кабинетот на Трамп ќе бидат потврдени на предложените функции.

„Многу сум импресиониран од досегашните номинации. Оптимист сум дека сите ќе бидат потврдени“, вели Мич Мекконел, сенатор Републиканец, лидер на мнозинството во Сенатот.

Доколку сенаторите Демократи ги остварат своите најави за одолговлекување на номинираните членови на новата администрација во Белата куќа, можно е кабинетот на новиот американски претседател Доналд Трамп да се комплетира дури во март. Потврдувањето на новиот кабинет на Доналд Трамп во новиот 115-ти состав на Конгресот се очекува да помине без проблеми.

Членовите на кабинетот на претседателот Барак Обама биле потврдени за само една недела по неговата инаугурација.

Ирина Гелевска, постојан дописник од Вашингтон за МРТ