Предлог за локални избори во октомври

Претставници на парламенарни партии на координација кај собранискиот спикер, Талат Џафери се договорија да предложат одржување на локалните избори за првата половина на октомври годинава. Како што соопштија од прес-службата на Собранието СДСМ, ДУИ, БЕСА, Алијансата за албанците и ДПА се договориле дека од исклучителен приоритет за Република Македонија е постигнувањето договор за донесување на Предлог-закон за изменување и дополнување на Изборниот законик со кој одржувањето на локалните избори ќе биде предвидено за првата половина во месец октомври, а мандатот на сегашните градоначалници и советници да биде продолжен до изборот на новиот состав на членови на советите и градоначалниците“.

„Џафери и претставниците на политичките партии се согласија дека политичкиот дијалог мора да продолжи во Собранието на Република Македонија и дека сите политички субјекти треба да бидат одговорни пред граѓаните и да придонесат за продолжување на демократските процеси во Република Македонија“, наведено е во соопштението.

На средбата не присуствуваше претставник од ВМРО-ДПМНЕ. Од партијата остануваат на ставот дека тој е нелеглно избран на функцијата. Ставовите ги соопштија на прес-конференција. Велат почетокот на јули е најповолниот датум за одржување на локалните избори бидејќи, според партијата, во интерес на граѓаните е час поскоро да изберат локална власт која ќе реализира проекти за нивните потреби.

„ВМРО-ДПМНЕ повторно посочува дека доколку парламентарното мнозинство собере храброст, најдобро за државата и за граѓаните ќе биде, да се согласат заедно со локалните, на ист трошок, да се организираат и нови парламентарни избори“, изјави Драган Данев од ВМРО-ДПМНЕ.

Мандатот на локалната самупорава истекува денеска.

Игор Панов